星期日, 襯阿女訓咗, 整咗30粒糯米糍........
由頭到尾, 足足整咗2個鐘呀....... 因為驚整整下阿女會醒, 所以急急腳咁整!!!
到後半部的熟粉面糯米糍, 搓得唔係咁夠圓...... 核核特特咁........ 唉...........
都係椰絲糯米糍先見得人!!!
今次做出黎的效果, 都好好....... 超軟熟呀! 而且鬼咁大粒架......
每粒約重60g (40g 糯米 + 20g 豆沙餡), 真係抵食夾大件!!!!!
一粒的size足足等於兩粒奇華果d咁大.......
材料 (30粒的份量):
糯米粉300g
澄麵/ 粘米粉: 20g (是但用一樣, 今次我用咗澄麵)
紅豆沙1斤(約600g)
砂糖: 160g (已是少甜份量)
生油: 2湯匙
椰漿: 400g
清水: 400g
椰絲/ 熟粉: 適量
做法:
1. 量好各材料的份量
2. 將糯米粉及澄麵'西'過備用
3. 將紅豆沙'初'成一粒粒(20g一粒)
4. 將清水, 椰漿, 生油及砂糖一齊倒入煲中, 煲至滾起熄火, 其間要不斷攪動, 唔可以冚蓋
5. 馬上將滾起的(4)倒入(2) 內, 攪勻直至冇粉粒為止
6. 將(5)倒入大碟內 (碟面先舖上一層微波爐保鮮紙, 方便清潔)
7. 用大火, 將(6)蒸30分鐘, 放涼後就可以包入餡料
8. 準備一張微波爐保鮮紙(約30x30cm), 用匙'筆'出40g糯米糰, 將保鮮紙對摺, 壓平糯米糰, 再包入豆沙餡, 收口滾圓即可(全程用保鮮紙包住做)
9. 將已滾圓糯米糍倒入裝滿椰絲/ 熟粉的碗內, 平均沾上即可
溫馨是示:
1. 包糯米糍一定唔可以就咁用手包, 會好痴架, 就算雙手搽油/濕水都係痴!
2. 之前果次, 我用BBQ手套去包的, 但發覺都係有d痴....... 而且有d難control
3. 今次轉用微波爐保鮮紙去包, 發覺好正! 一d都唔痴, 好易control, 保鮮紙唔駛搽油架...... wakakaka....... 真係意外大發現!
4. Step (4) 一定要不斷攪動, 因為有椰漿的關係, 好易痴底! 記得唔好冚蓋, 否則會滾瀉!!!! 有排清潔呀......
5. Step (6): 碟面一定要舖上一層微波爐保鮮紙, 唔舖的話..... 會痴碟, 好難清洗! 但保鮮紙唔駛搽油, 大家可以放心, 唔會痴架!!! ^.^
6. 熟粉即係炒熱過的粉..... 可以用白鑊炒/叮熱都得(5分鐘即可)..... 今次我用咗用剩的糯米粉去做, 唔好浪費嘛...... 其實用粟粉都可以
做法過程逐格睇:
上图: 先量好各材料份量
下图: 糯米粉要'西'過先用, 會滑好多架!
將清水, 椰漿, 生油及砂糖一齊倒入煲中, 煲至滾起(下图)熄火, 其間要不斷攪動
上图: 完成下图後, 攪勻直至冇粉粒為止
下图: 將煲滾的椰漿糖水倒入糯米粉內
