換花成功

哈哈~~~ 好開心呀! 換花成功~~~

早前出咗個post, 想同blog友交換花花碟~~~

居然比同事施銘(依家已中LC & Staub毒)問: 碟都有得交換, 係咪架????  

你真係有所不知~~~ 我地d LC fans的瘋狂程度架喇...... 

Blog友Jennifer 係出post有耐, 已經聯絡我交換花花碟喇,

用咗隻漸變棗紅色, 換咗隻漸變橙返黎...... 靚到暈! 來自泡菜國架~~~

哈哈哈~~~~ 依家我一共有4款色的花花碟,  

革命尚未成功, 仍需努力~~~

我仲要集齊其他色架!!!!  



係呀, 仲影咗張廚房的另一角,

早前敗入的蒜頭盅及大口仔, 分別用咗黎放黃薑及用過的零碎薑蒜~~~~

超好用, 又整齊呢~~~ 廚房做起野上黎, 得心應手得多啦!!!   

顏色又colourful喎, 日日見倒都開心d呀!  

靚靚LC煲夾 ^.^

今日行開沙田, 又忍唔住到LC counter巡視一下~~~

Sales姨姨好好人, 見我買2盒煲夾, 比咗個discount我~~~  鍚晒你呀!  

買咗紅色心心及橙色圓形煲夾,

用黎襯返我個棗紅色魚仔蜂巢鍋及南瓜煲~~~  

隻色同個煲襯絕呀! 當堂靚晒!!! 

有版有眼

每次行過琴行, Charlie一定要入去~~~

逐個鋼琴彈完先肯走架~~~ 

今日又路過琴行, 哈哈哈...... 佢彈過晒人地十幾個鋼琴呀~~~

仲識得坐定定咁彈~~~ 好醒喎!!! 有版有眼~~~  

好啦, 到你4歲時, 一於比你學琴先~~~

秋葵紹菜炒粉絲

秋葵好有益, 多食都冇問題~~~ 

質感滑潺潺的, 好攪笑!!!  

佢的表面長滿毛毛, 好cute架,

之前從未食過, 成日諗: d毛毛食唔食得架? 要唔要刮走呢???

wakakaka...... 答案係: 唔駛架! 只要切去頭尾, 一開二, 煮10分鐘就食得!!

快靚正, 又好味!!! 

無論清炒, 定用黎煮咖哩, 一樣好食!!

快d買黎試下啦, 包你鐘意食架~~~



材料:
秋葵15條
紹菜半個
粉絲1把
蒜頭2粒
薑2片

做法: 

1. 粉絲浸水半個鐘, 瀝乾水備用

2. 秋葵切去頭尾, 一開二備用

3. 爆香薑片, 加入紹菜略炒, 最後10分鐘加入秋葵一齊煮 (秋葵唔需要煮太耐, 10分鐘就得)

4. 加入適量食鹽調味, 最後加入粉絲焗1分鐘, 略炒即成

Staub - 無水蒸雞

好耐冇整我的撚手蒸雞喇...... 早幾日諗起, 都流晒口水呀!!

一於今晚整返餐食啦~~~ Yummy~~~



材料:
冰鮮雞一隻
金針及雲耳各半飯碗
紅棗2大粒
薑絲適量

醃料:
豉油3湯匙, 砂糖3茶匙, 燒酒3茶匙, 麻油1茶匙 (燒酒一定要落, 係這個餸的靈魂黎架)

做法:
1. 冰鮮雞解凍切件, 加入醃料備用

2. 金針雲耳浸軟, 去硬頂及清洗, 金針打結備用

3. 紅棗洗淨去核, 切絲備用

4. 鋪上金針雲耳墊底(唔駛落油)

5. 將雞件連汁倒入凍鍋內, 灑上薑絲及紅棗絲

6. 先用中火煮5分鐘, 再轉細火煮多15分鐘, 焗10分鐘即成



溫馨提示:

1. 雞件最好醃夠3個鐘, 咁先入味架 (唔夠時間的話, 起碼都要醃半個鐘)

2. 金針打結, 會精緻d, 宴客一流  

3. 蒸雞時間, 因雞隻的大細而定, 請自行執生! 今次姐姐斬得比較大件, 蒸20分鐘就啱啱好!

鋪上金針雲耳墊底  

雞件連汁倒入凍鍋內, 灑上薑絲及紅棗絲, 可以開始煮喇