好慘呀........ 近期腸胃唔多好!
一食街飯就肚痾......... 痾到個人都弱晒!!!!
星期六睇咗醫生, 乖乖食葯....... 好咗少少!
所以, 星期日都係自己煮下飯, 避免出街食....... 星期一又可以帶飯返公司!
用Staub黎煮煲仔飯, 的確考起我....... 令我有唔少錯敗感...... 包括: 肉唔熟, 生米, 飯太多水(太軟), 痴底.....
但經過多次的嘗試, 及參考Blog友的食譜........ 我終於學倒一d技巧......
今次做出黎的煲仔飯見得人喇........
排骨熟晒又juicy, 飯唔再生米, 但又唔會太軟身喎....... 而且冇痴底架, 粒粒飯都食得! wakakaka.......
因為冇痴底, 所以個鍋超易洗架! 用水及海棉已經攪掂!!! yeah!!
Control倒火候及時間, 係煮煲仔飯的先決要素.......
我會好好記往今次的經驗, 下次再煮煲仔飯一定會成功啦! hahaha
路明真係超級乞人憎呀!
佢居然同我講: 你個肚唔多舒服, 不如煲粥啦, 柴魚花生豬骨粥好嗎???
我怒啤佢: 點解要我煲你至愛的柴魚花生豬骨粥比你食呀! 我係病人黎架, 點解唔係你煲比我食呢?
路明: wakakakaka...... 講下啫...... heehee (知衰中.......)
材料:
白米2杯
清水1.5杯
排骨約$25
臘腸2條
醃料:
豉油3茶匙, 砂糖1茶匙, 麻油少許, 清水2茶匙
做法:
1. 排骨洗淨抺乾, 加入醃料; 臘腸洗淨切粒備用
2. 白米洗淨後, 浸水30分鐘備用
3. 將白米及1.5杯清水倒入鍋內, 用中火煮3分鐘
4. 開蓋, 用筷子攪勻白米, 轉細火煮5分鐘 (用筷子攪勻, 可避免痴底)
5. 加入臘腸排骨, 以大火煮2分鐘, 再轉細火煮15分鐘
6. 熄火, 焗15分鐘就食得(千其唔好開蓋)
