Staub - 滋陰養顏@花膠水魚湯

 

水魚湯....... 我從來未飲過!

更加唔識, 唔會煲.....

事關, 水魚個樣太似烏龜, 切開一件件時, 好得人驚.........

但當我知道, 水魚湯超級滋陰養顏, 補而不燥, 男女老少都飲得時.......

我就決定要煲, 死就死啦......... 鬼叫對我同阿女都好咩!

星期一已經叫魚檔老闆留定隻水魚, 等路明放工去拎!

我咁'騰雞'又'驚青' ........ 當然叫老闆幫我劏啦, 佢仲好好人, 幫我切好晒, 去埋肥膏, 汆水及去潺添........

基本上, 返到屋即刻煲得架喇.......

但為咗安心起建........我都係再汆水一次, 沖洗一下先煲! 清潔d嘛...... wakakaka!

今次又用咗Staub 24cm round去煲, 佢超級鎖水, d湯水只係少咗dd....... 因為比d藥材吸咗........

全煲原汁原味, 真係好似人地做的燉湯, 超正!!!!

忍唔住......... 已經係晚上12:00, 都要飲返碗先訓! wakakaka........

超清甜架! 我仲食埋水魚裙邊, 口感好似食緊花膠!

唔怪得個魚檔老闆, 千叮萬囑一定要食這個部位啦.......

佢仲話, 佢地一家每星期都會煲一次水魚湯, 對身體好好好好好好好好架喎!!!! 而且補而不燥, 一年四季都啱飲!




係網上搵咗有關水魚的資料及益處:

水魚為鱉科動物的中華鱉，別名甲魚、團魚、廣州人叫水魚。牠喜歡生長於湖、河、塘、池的泥土中，日常以捕食蟲類、細小魚類為生。會游水和在陸地上、草層里走動。分佈於亞熱帶地方，不過現時多以人工養殖，一年四季都有生產。

民間喜歡用牠來做食療用途，食其肉及肉裙。其背甲即鱉甲、血即鱉血、脂肪即鱉脂、膽即鱉膽、卵即鱉卵、鱉甲熬成膠即鱉甲膠，都供中藥用途。水魚可去濕滋陰，利尿強身。對容易疲勞或體質弱人士, 都有相當好的滋補效力。不寒不燥, 可作全年的滋補湯水。

鱉肉味甘、性平。含有蛋白質、碳水化合物、脂肪、鈣、磷、鐵、硫胺素、核黃素及維他命A、維他命B、無機鹽等。裙部分則含有動物膠。鱉肉具有滋陰涼血，補中益氣之功。主治中氣不足、虛勞發熱、帶下崩漏、肺結核症癆熱等病，鱉頭治體虛脫肛，婦人產育後、腹肌鬆弛而引致子宮下垂、小便失禁。

民間流行「水魚滋陰湯」：取水魚一隻，去頭及內臟，切塊。配百部三錢、地骨皮三錢、知母三錢，生地八錢，各藥物擺入食物袋中紮口，與水魚共煮至肉熟，去藥食肉飲湯，每日一劑，分兩次服。功能滋陰清熱。適用於陰虛潮熱，夜睡不寧，手足心熱、陰虛出汗之症，特別是患肺結核症（肺癆）者更具療效。

水魚背殼的甲骨，中藥稱之為鱉甲，有治虛勞、理衰損、除骨蒸勞熱之效。中醫處理陰虧，虛熱、肺癆潮熱等症候，每每都用鱉甲配用於方劑中。水魚除肉和甲殼具有藥用價值之外，血和卵，也有治病功效，民間有用水魚血治療肺癆病的土方，亦有人用水魚血撈米煲粥給兒童吃，謂有治疳積，消除肚脤之效。水魚卵連殼用食鹽醃製，收藏備用，遇有患濕熱下痢，則用三五隻鹹水魚蛋煲粥。據說，不但對於黑熱下痢有療效，對血痢療效亦不錯。對於體溫低，身體虛弱，腎臟虧損，陽痿不振，經常感到腰部痠痛，小便頻數，腦力減退，冬天怕冷，夏天怕熱之類病者。用北耆五錢至一襾，桑寄生五錢煎水，將此藥液燉水魚肉，作為食療品有較佳療效。

材料:
水魚 1隻 (約一斤重)
花膠 3隻
瘦肉 $15
紅棗 5粒
淮山 5錢
杞子 3錢
北耆 3錢
黨參 3錢
圓肉 3錢
蓮子 3錢
百合 3錢
生意米 1兩
芡實 1兩
薑 2片
清水 2.5L

做法:  (附加做法相片)

1. 將所有乾貨材料清洗備用, 紅棗去核

2. 花膠, 瘦肉及水魚汆水, 沖洗備用

3. 預備2.5L滾水, 加入所有藥材, 用中火煲半個鐘

4. 加入花膠, 瘦肉及水魚, 用中火煲半個鐘後, 轉細火煲多2個鐘即成

5. 落鹽調味




Step 1. 將所有乾貨材料清洗備用, 紅棗去核




Step 2. 花膠, 瘦肉及水魚汆水, 沖洗備用

Step 3. 預備2.5L滾水, 加入所有藥材, 用中火煲半個鐘

Step 4. 加入花膠, 瘦肉及水魚, 用中火煲半個鐘後, 轉細火煲多2個鐘, 落鹽調味即成

Before - 剛加入花膠, 瘦肉及水魚, 可以開始煲喇

   


After - 煲好喇, 依個係2個半鐘後的樣子