鯪魚粉葛湯

真好耐都冇煲老火湯, 今日星期六, 放工同路明食完lunch後, 到街市買餸, 見d 粉葛咁靚, 一於煲粉葛湯啦, 加咗赤小豆, 好去濕架! 中醫話赤小豆的功能係健脾去濕, 春天夏天最啱飲, 雖然依家係秋天, wakakakaka.......煲得遲咗少少, 但都可以飲架! 飲咗個人冇咁累, 冇咁重, 精神好多呢! 俗語有話葯補不如食補, 平時得閒, 煲返d 湯水飲, 對身體好好架!

今日買咗好多野, 包括星期一的餸添, 所以好鬼重, 拿拿聲拎返屋企, 叫姐姐洗好d 材料, 豬骨出咗水先, 跟住我就接力, 煲湯一定要我自己煲架!

材料: 粉葛約斤半, 赤小豆少許,  扁豆少許, 鯪魚1條，西施骨$30, 陳皮1片, 蜜棗2 粒

做法:
1. 陳皮浸軟, 刮瓤; 赤小豆&扁豆清洗備用
2. 西施骨清洗後飛水, 再用清水清洗, 去除血水&泡泡
3. 粉葛去皮切片, 鯪魚煎香兩面, 放入魚袋備用
4. 煮沸清水, 放入所有材料, 煲3小時(放入材料後, 水再次滾起後開始計), 加入少許食鹽即成



注意:
1. 赤小豆&扁豆的份量約二比一, 共約大半個飯碗咁多, 南貨舖賣$5一包(有齊2種豆, 好方便呀)
2. 魚袋可以同赤小豆&扁豆一齊買, 係街市的南貨舖就有架喇, $3一個
3. 火候說明: 3個鐘的煲湯過程, 頭半個鐘要用大火, 之後用中細火, 直至完成