Staub - 支竹炆鯇魚

這個餸簡單又有益! 而且好啱阿女食添…..

第一次用Staub黎炆野, 心情好緊張! 火候及時間的控制, 真係要好好同個鍋溝通一下…..

好彩…… 煮出黎的效果都唔差......... 但唔係好囉, 仲差少少......

睇黎, 真係要煮多幾次, 摸熟d先得喇!

材料:
1. 鯇魚半邊
2. 支竹半包
3. 蔥段, 薑片, 蒜頭少許

芡汁:
蠔油1湯匙, 砂糖2茶匙, 麻油少許, 熱水半碗, 生粉1茶匙

準備工夫:
1. 清洗鯇魚, 抺乾水備用
2. 支竹用手搣成所需長度(約10cm)後, 浸清水(轉灣位比較硬, 要浸20分鐘, 其他則浸10分鐘)
 

做法:
1. 以中火燒熱個鍋(約需5分鐘), 落油爆香薑片及蒜頭至金黃色

2. 放入鯇魚, 兩面煎至金黃色,

3. 加入熱水半碗及芡汁(生粉除外)

4. 當水再次滾起, 轉細火煮20分鐘 (最後10分鐘先落支竹)

5. 落生粉水, 熄火後再焗多15分鐘即成 (最後5分鐘落蔥)

 

溫馨指示: 
1. 如果唔係用Staub鍋去煮, 熱水的份量起碼要3碗, 因為Staub鍋的鎖水工能好好, 煮好後水份都差唔多架…… 如果落得太多水, 條魚就會淡而無味….. 而且個芡汁會水汪汪添!!

2. 芡汁(生粉除外)跟熱水同一時間落會好d, 可以比條魚充份吸味!

3. 記得上述所講的20分鐘, 途中要反下d支竹架, 否則一d硬一d軟, 軟硬度唔夠平衡!

4. 每個爐的火候都唔同, 所以 時間上, 請自行執生啦!




P.S.: 我依家跟個Staub都係溝通緊架咋, 希望煮多d, 會快d上手!