燒腩仔

又係燒腩仔.......  

其實之前已經整過, 但覺得仲有改善空間, 所以再整多次!

經過上次的經驗, 今次焗燒腩仔, 我就切開三份, 一來易熟d, 二來每一面都可受熱, 顏色靚好多架!

真係比上次成功好多...... 個皮爆得好靚, 而且好脆好脆!!!

今次買的五花腩好靚, 一層肥一層瘦架...... 焗起上黎好鬼juicy!!! 又唔怕鞋口...... Yummy!!

做法真係好簡單, 大家都試下做啦!!! 



材料: 

五花腩斤半
五香粉半湯匙
粗鹽適量

準備工夫:

(1) 先將五花腩清洗好&抺乾, 切開三件
(2) 用五香粉搽勻五花腩(皮除外)
(3) 豬皮舖上一層粗鹽, 約0.5cm厚
(4) 唔好包保鮮紙, 將五花腩直接放入雪櫃, 醃過夜!  [註1]


做法:

(1) 預熱焗爐10分鐘, 200度火
(2) 扲走豬皮上的粗鹽, 再用錫紙包住五花腩(豬皮果面除外), 放入焗爐 (千其唔好用水清洗豬皮)   [註2]
(3) 先以200度焗8分鐘, 再轉170度焗60分鐘
(4) 放涼後, 即可切件上碟


溫馨提示:

註1 : 唔包保鮮紙, 將五花腩直接放入雪櫃, 目的係要將豬皮的水份, 經過一晚時間充分吸乾, 咁樣就會有芝麻皮架喇!! 脆卜卜..... 好正架!

註2 : 除去粗鹽後, 千其唔好諗住用水清洗豬皮呀!!! 咁樣........ 前一晚的吸水工夫就白費..... 一定做唔倒皮芝麻皮, 唔會脆卜卜!