Staub - 金針雲耳炒青瓜

 

e個餸真係好清新, 好啱夏天食架!!

其實, 媽媽最鐘意煮青瓜食....... 一個月起碼食幾次架!

久而久之...... 我都鐘意食!

但結婚後, 我都冇煮過瓜類的餸菜, 事關路明唔多鐘意食瓜....... 因為佢細個時, 屋企好少煮的!!

其實........ 同佢的習慣真係好唔同........ 不過, 幾過幾年的生活, 都開始適應咗lu.......



今晚一於煮青瓜等佢試下......

估唔到........ 佢係咁食, 仲話好好味添!!

我都話好食架啦....... 係都唔試........ 成日都食菜芯! 唔厭架咩??



材料:
青瓜2條, 金針, 雲耳及蝦皮適量

汁料:
豉油3茶匙, 糖1茶匙, 麻油少少, 生粉半茶匙, 水1/3碗
做法:
1. 金針雲耳浸軟, 清後去'定', 去頭
2. 蝦皮清洗抺乾備用
3. 青瓜去皮及'郎', 切幼條備用 (青瓜可留皮, 今次刨晒d皮, 絶對係技術上出錯, 姐姐唔記得青瓜要刨間條皮)
4. 落油, 爆香薑片及蒜頭, 再加入蝦皮
5. 倒入青瓜, 金針及雲耳炒勻, 加入清水1/3碗, 冚蓋煮8分鐘至軟身
6. 加入汁料快炒, 直至滾起即可