以往過年的蘿蔔糕, 都係媽媽做的!
今年攪攪新意思, 自己整呀!
有Miele幫手, 一d難度都冇, 輕鬆又自在!
自己食的關係, 只係買咗4斤蘿蔔咁多咋,
可做2底8寸直徑糕盤 (份量等於以下食譜的4倍)....
份量啱啱好!!
由於阿女唔食得蝦米,
所以整咗4盅走蝦米的蘿蔔糕比佢,
效果好靚, 又cutie!
材料 (以一斤蘿蔔計):
- 白蘿蔔 1公斤
- 粘米粉170g
- 澄麵 4湯匙
- 臘腸 1條
- 臘肉 1/2條
- 蝦米 50g
- 瑤柱10粒
- 即食芝麻適量
- 蔥花適量
- 清水/ 蝦米瑤柱水 3/4杯
- 砂糖3茶匙
- 鹽1 茶匙
- 胡椒粉少許
做法:
- 臘腸、瑤柱、蝦米蒸10分鐘，臘肉汆水3分鐘，吸乾水份, 切粒/撕碎備用。蘿蔔去皮，刨絲及1/4切條待用。
- 用大碗將粘米粉和澄麵預先拌勻，備用。
- 燒熱半湯匙油，用中火爆香臘肉，臘腸，然後加入蝦米及瑤柱，直至聞到香味，盛起備用。
- 用白鑊炒勻蘿蔔絲，加入胡椒粉及清水，加蓋煮至蘿蔔絲軟身。
- 熄火後，加入粘米粉及澄麵，再加入其他配料(留起少量配料洒面作裝飾)，再攪勻。
- 將粉漿倒入糕盤內，蒸 60分鐘即可。用筷子插進蘿蔔糕中央，如筷子冇沾上粉漿，即代表完全熟透。即刻洒上芝麻, 蔥花及蝦米臘腸瑤柱碎。
我留起少量材料放係糕面, 加入芝麻及蔥花, 效果好靚啊~
來個近鏡先..... 哈哈~~~ 材料十足
盅仔蘿蔔糕 - 花型及心型好靚呀!
Yummy... yummy~~~
睇到口水流呀!!!
臘腸係元朗大同餅家買的, 好好味!!!
幾多臘味....
好多選擇呀!!!
今次買的蘿蔔好靚, 冇花心架~~
媽鎷幫手買糕盤~~
材料先用Miele蒸10分鐘
蝦米瑤柱要加入滾水才蒸
話咁快蒸好喇.....
蝦米瑤柱先隔去水份~~~
再吸乾水份備用~~
d水唔好倒呀.... 精華黎架, 要用黎蒸糕..... 味道好好多!!
臘肉要汆水, 去除油份
用廚紙吸乾水份備用
蘿蔔要刨成絲..... 1/4要切成條~~ 口感好d架
將所有材料成粒粒備用
用少許油, 爆香所有材料
量好粉類材料~~~
加入粉漿及所有材料
倒入糕盤, 可以去蒸喇~~~
一次過放晒入爐, 蒸60分鐘即可
話咁快...... 就蒸好喇
忙咗成朝.... 連lunch都未食,
簡單煮個麵就ok~~
加埋幾粒墨丸, yummy.... yummy.......
好好味呀!!
沒有留言:
張貼留言