Staub - 青咖哩椰香雞

上星期六, 我地一家三口到九龍城行街街,

目的係要到泰國街走一趟, 買咗少少泰茄及三串鮮胡椒煮餸!

泰茄係for青咖哩雞, 而鮮胡椒係for胡椒炒蟹! 諗起都正!

老闆娘話鮮胡椒放入雪櫃的話, 可放一個月咁耐架.........

所以, 遲d先整胡椒炒蟹, 都冇問題!





材料:
雞比2隻
甘筍1條
泰茄4個
紫洋蔥1個
細椰漿1罐
青咖哩一包
紅蔥頭2粒切片
薑2片

做法:  

1. 甘筍, 泰茄及洋蔥洗淨, 切粒備用

2. 雞脾洗淨, 切大件及汆水備用

3. 凍鍋落油, 用中火爆香紅蔥頭及薑片, 將雞件回鍋, 炒至金黃色

4. 加入青咖哩略炒

5. 加入甘筍, 洋蔥, 椰漿炒勻

6. 以中火煮至再次滾起, 轉細火煮多20分鐘

7. 最尾10分鐘, 加入泰茄即可

雞肉汆水後, 用紅蔥頭及薑片爆香, 再加入青咖略炒

再加入椰醬, 滾起後用細火煮20分鐘即可(最尾10分鐘加入泰茄)

醉鴨舌again

今晚又整醉鴨舌, 係路明的至愛.......

簡單, 易做, 又好味! 作為餐前小食, 一流呀!

我覺得醉雞汁唔夠酒味, 自行加入2湯匙花醀酒, 好正呀, 好香酒味!!!




材料:
鴨舌1磅
薑2片
蔥1棵
醉雞汁1支 (另加2湯匙花醀酒)

做法:

1. 鴨舌洗淨後, 用滾水, 薑及蔥煮10分鐘
2. 將鴨舌放入冰水, 冷卻後抺乾, 倒入醉雞汁內, 放入雪櫃過夜即可

Staub - 無水豉汁蒸白鱔

今晚, 又用咗Staub黎整無水豉汁蒸白鱔!

15分鐘就食得, 係咪好方便呢?

因為條白鱔好大條, 又肥.......

所以, 我冇用油爆香蒜蓉及豆豉蓉....... 如果爆的話, 會香口好多喇!! 

唉..... 食少d油好d! 健康d嘛!!!!!!



材料:
白鱔 半條 (約一斤重)
子天椒  3條


醃料:
蒜蓉 2茶匙
豆豉蓉 4茶匙
麻油     半茶匙
豉油 1湯匙
清水 2湯匙
做法:

1. 準備蒜蓉及豆豉蓉, 子天椒切粒

2. 白鱔原條汆水3分鐘, 用粗鹽擦外皮去潺 (可用刀仔代替), 去除內臟及肥膏, 抺乾備用

3. 用手將醃料及白鱔攪勻, 醃半個鐘

4. 凍鍋落料, 將白鱔舖係鍋內, 再倒入醃料, 開火煮6分鐘(中火)

5. 再轉細火煮多9分鐘, 灑上子天椒粒

6. 試味即可

溫馨提示: 

1. 如果唔係用Staub去做無水蒸野, 2湯匙清水唔駛加, 而且豉油份量要減半, 即半湯匙就得喇!

2. 大家唔介意食肥少少, 可以先爆香蒜蓉及豆豉蓉先醃, 真係香口好多架!

3. 蒸煮的時間, 因白鱔的大細及厚度而定! 請自行執生!  (我上面提過, 今次買的白鱔好鬼大條, 而且切成厚件, 我就用咗15分去蒸, 熟透之餘, 爽口又多汁, 好好味呀)

Staub - 愛爾蘭黑啤牛肉

上次整咗紅酒炆牛尾, 今晚一於攪攪新意思先.......

今次我會用黑啤黎燉牛肉! 用的係愛爾蘭黑啤(大罐裝)!

只要係黑啤就得, 邊度做都冇問題o既!

其實, 唔用黑啤, 用普通啤酒都得, 自己鐘意就OK啦!

味道唔錯架, 好濃郁, 煮好後仲有少少酒味....... 好正!



材料:
牛肉650g
洋蔥2個
薯仔1個
乾蔥2粒
薑2片

調味料:
茄膏1罐
黑啤1罐
砂糖3茶匙
豉油1湯匙
做法:
1. 牛肉洗淨, 汆水5分鐘

2. 將洋蔥及薯仔切粒備用 (薯仔要浸鹽水, 避免變色)

3. 用乾蔥,薑片起鑊, 先煎香牛肉至金黃, 加入蔬菜粒略炒

4. 落茄膏, 黑啤及砂糖, 攪勻全部材料

5. 先用中火炆15分鐘, 再轉細火炆多75分鐘

6. 最後加入豉油, 試味即可




製作過程逐格睇:

 
這是全部材料

 
用乾蔥,薑片起鑊, 先煎香牛肉至金黃

加入蔬菜粒略炒

落茄膏, 黑啤及砂糖



攪勻全部材料, 先用中火炆15分鐘, 再轉細火炆多75分鐘

Staub - 芥菜魚球湯

今晚一次過整咗2個湯 - 水魚湯及芥菜魚球湯

水魚湯係比阿女飲的, 而芥菜魚球湯就係我地大人飲!

所以今晚攪到8:00先食飯....... 所有野都遲晒, 最終遲咗訓!



食飯時, 路明寸寸貢咁話: 咦...... 今晚中西兩食呀? mix & match喎...... 西式燉牛肉 + 芥菜魚球湯

我就話: 咁鐘唔鐘意先........

路明: 當然鐘意啦!

wakakaka...... 算你啦!!!

最後, 路明食咗3 碗飯 + 2 碗湯咁多呀!!!!!! 

Staub - 餚肉

前日整咗煲鹹豬手湯飲,

話到明係一手兩食, 當然會有下半場啦! 點只飲湯咁簡單呀!!

之前切好晒的甘筍, 西芹及豬手肉, 經過一晚冷藏, 今晚終於食得喇!

好方便,放係碟上切件即可!




做這個餸, 真係一粒鹽都唔駛落架! 否則一定鹹死!

記得豬手一定要用薑蔥汆水10分鐘, 再清洗一次, 去除豬'酥"味!

我覺得d蔬菜林咗少少, 硬返d的話, 口感會好好多!

所以, 我建議大家, 最後一個鐘先落蔬菜去煮啦!

其實，我冇用過重物去壓實架，只係用手壓咗十下咁多......

但做出黎的效唔錯，夠硬身，唔會散開晒！

我相信係豬手的骨膠原關係, 冷藏之後, 可以將瘦肉及蔬菜痴到實一實!

所以呢......... 切好的粒粒, 一定要攪勻, 再壓實, 先可以冷藏!

Staub - 一手兩食

今次用咗鹹豬手黎煲湯, 加入少少西芹及甘筍,

煲咗2個鐘咋, 隻豬手都林晒lu...... 一夾, 肉骨已經可以分離!

冇牙阿婆都食倒架!

因為用咗 鹹豬手的關係, 個湯已有鹹味, 仲啱啱好添....... 所以我冇再落鹽調味!!

煲好後, 湯面係有d油架, 記得筆走, 要食得健康先得!



而豬手, 甘筍及西芹要先筆起放涼, 再切成細粒,

攪勻後倒入盒肉, 放入雪櫃, 用重物壓一晚, 食前切件即可! 



材料:
急凍鹹豬手1 隻
甘筍1條
西芹1/4棵
清水適量
做法: 

1. 鹹豬手解凍及清洗, 用薑蔥汆水10分鐘, 再清洗一次 (去除豬'酥'味)

2. 甘筍及西芹切粒

3. 煲滾熱水, 加入鹹豬手, 甘筍及西芹, 以中火煲10分鐘, 轉細火煲50分鐘

4. 熄火, 焗1個鐘

5. 再以中火煲10分鐘, 轉細火煲50分鐘

6. 筆起豬手, 甘筍及西芹, 放涼後切成細粒,

7. 攪勻後倒入盒肉, 放入雪櫃, 用重物壓一晚, 食前切件即可