Staub公雞 - 雪梨蘋果瘦肉湯

天氣涼涼地又乾燥, 係時候煲返d清潤湯水飲下!  

好耐都冇煲雪梨蘋果瘦肉啦......... 今次一於煲下先!

這個湯係阿女的至愛, 比佢當水飲, 健康又有益!  



材料:
天津鴨梨3 個
蘋果2 個
南北杏適量
蜜棗2粒
瘦肉$15
做法:

1.  天津鴨梨及蘋果, 每個一開四件, 去核去皮

2.  蜜棗及南北杏清洗備用

3.  瘦肉清洗後, 切片汆水備用 (唔需要加調味料)

4.  煲滾半煲清水

5.  將所有材料加入滾水內, 大火煲至滾起, 轉細火煲一個鐘即可

Staub南瓜 - 三杯雞

家中的蘿勒快高長大....... 生得好高呀!!!!

係時候要修剪一下, 用黎煮三杯雞就最啱喇! 

我做的三杯雞一d都唔正宗........

所謂三杯雞, 包括一杯豉油, 一杯麻油及一杯酒, 比例係1:1:1

因為我怕肥, 所以減少麻油的用量!!!!

但味道唔錯架! 





材料:
雞1隻
薑3片
紅蔥頭2粒
蘿勒適量

調味料:
豉油2湯匙
麻油1湯匙
花雕酒4湯匙

雞件醃料:
豉油1湯匙, 砂糖3茶匙, 燒酒2茶匙, 麻油少許

做法:

1. 雞隻解凍, 洗淨及切件後, 加入醃料醃至少半個鐘

2. 預備紅蔥頭, 薑片及羅勒

3. 凍鍋落油, 加入薑片及紅蔥頭起鑊, 倒入雞件, 炒至金黃色, 再加入調味料炒勻

4. 用中火煮至滾起, 改用細火煮20分鐘

5. 加入羅勒, 調味埋芡, 熄火焗10分鐘即可

溫馨提示:

1. 炆煮過程中, 要間中炒下, 咁做可以令雞件平均受熱, 最重要係避免痴底



做法過程:

蘿勒洗淨切段備用

凍鍋落油, 用薑片及紅蔥頭起鑊

倒入雞件, 炒至金黃色

加入調味料炒勻

用中火煮至滾起, 冚蓋改用細火煮20分鐘即可

LC - Steam Egg

LC黃椒 - 冬瓜粒粒肉碎濃湯

冬瓜粒粒肉碎濃湯, 簡單又好味!

只需15分鐘就食得....... Yummy!!!   




材料:
冬瓜1片(約1寸厚)
肉碎適量
濃湯寶1粒

調味料:
豉油2茶匙, 砂糖1茶匙, 生粉半茶匙, 麻油少許


做法:
1. 肉碎加入調味料, 醃半個鐘備用
2. 預備8碗清水, 加入濃湯寶煲滾
3. 加入冬瓜, 用細火煲10分鐘
4. 加入肉碎煲2分鐘即成

LC & Staub - 蔬菜2人組

今晚的晚餐好簡單,

只要翻熱琴日炆好的茄汁牛肋條及煲個冬瓜粒瘦肉湯就得, 真係快靚正架, 20分鐘有飯開!

南瓜煲自出院以黎, 第一次同新到步的黃椒合作!   

黃+橙好襯呀! 大家同樣係蔬菜, 又係CAST IRON煲煲, 雖然唔同牌子.......... 但好夾喎!!!   

一齊上枱, 真係好靚架!   

星期日晚餐

阿女特別order, 話要食pizza........

好啦, 咁啱我又唔想煮.........

星期日的晚餐, 簡簡單單又攪掂! 正........  

份量啱啱好, 而且阿女又食得超好開心!!