琴日係同事S小姐的生日~~~
咁啱自己有事, 放咗假.......
send咗個message比佢, 講聲生日快樂~~~
佢話好懷念我整的糯米糍呀,
wakakakka..... 難得有人欣賞, 二話不說應承咗去整.......
努力之下, 一口氣整咗30粒~~~
這個食譜的份量啱啱好, 一定夠分啦!
話時話, 今次改用咗同是泰國出產的糯米粉 - 白象牌~~
粉質好幼滑, 雖然今次冇過篩, 但做出黎的糯米糰都可以滑一滑呀! good~~~
材料: [30粒的份量(約2寸大)]
糯米粉300g
澄麵/ 粘米粉: 20g (是但用一樣, 今次我用咗澄麵)
紅豆沙1斤(約600g)
砂糖: 160g (已是少甜份量)
生油: 2湯匙
椰漿: 400g
清水: 400g
椰絲: 160g (剛好2包份量)
做法:
1. 量好各材料的份量
2. 將糯米粉及澄麵篩過備用 (因為懶, 今次冇咁做)
3. 將紅豆沙'初'成一粒粒(20g一粒)
4. 將清水, 椰漿, 生油及砂糖一齊倒入鑊中, 煲至滾起及砂糖熔化即可 (其間要不斷攪動, 唔可以冚蓋)
5. 馬上將滾起的(4)倒入(2) 內, 攪勻直至冇粉粒為止
6. 將(5)倒入盤內 (盤面先舖上一層微波爐保鮮紙/搽油, 方便清潔)
7. 以100度, 將(6)蒸30分鐘, 放涼後包入豆沙餡料
8. 準備一張微波爐保鮮紙(約30x30cm), 用spoon'筆'出40g糯米糰, 將保鮮紙對摺, 壓平糯米糰, 再包入豆沙餡, 收口滾圓即可(全程用保鮮紙包住做, 唔駛搽油, 都唔會痴架~~ 好方法
)9. 將已滾圓的糯米糍放入裝滿椰絲的碟內, 平均沾上即可
溫馨是示:
1. 包糯米糍一定唔可以就咁用手包, 會好痴架, 就算雙手搽油/濕水都係痴!
2. 之前我係用BBQ手套去包的, 但發覺都係有d痴....... 而且有d難control
3. 轉用微波爐保鮮紙去包, 發覺好正! 一d都唔痴, 又易control, 保鮮紙唔駛搽油架...... wakakaka....... 真係意外大發現!
4. Step (4) 一定要不斷攪動, 因為有椰漿的關係, 好易痴底! 記得唔好冚蓋, 否則會滾瀉!!!! 有排清潔呀......
5. Step (6): 盤面一定要舖上一層微波爐保鮮紙/ 搽油, 否則會好痴盤, 好難清洗! 但保鮮紙唔駛搽油, 大家可以放心, 唔會痴架!!!
6. '畢'糯米糰的spoon, 每次用前都要沾水(要預備半碗凍滾水), 可以大大減低痴住的機會架
7. 唔用椰絲, 可改用熟粉黎做, 熟粉即係炒熱過的糯米粉..... 可以用白鑊炒/叮熱都得(5分鐘即可).....
8. 唔用澄麵/ 粘米粉, 全320g用晒糯米粉都冇問題~~~
做法逐格睇~~
這是糯米糍所有材料, 還有豆沙未影呢~~
椰漿糖水正在煮緊~~~
椰漿糖水煮好後, 倒入糯米粉中~~~
可以開始攪勻喇..... 慢慢攪, 唔好心急!
開始混合喇..... 但仲有好多粉粒, 要繼續攪~~
攪掂喇..... 睇下, 好滑呢...... 好晒粉粒喇!
糯米糰放入盤內(盤底舖上保鮮紙), 可以蒸喇!
放入Miele仔先.... 有咗佢幫手, 真係好方便~~
豆沙'初'成一粒粒備用~~~
每粒豆沙約20g~~~
白o雪o雪的椰絲~~~ 好香呀!
話咁快就蒸好, 一d倒汗水都冇, 光滑如鏡~~ Miele抵讚
係咪好幼滑呢??? 依隻麵粉真係唔錯!! 下次再買~~
糯米糰放涼後, 可以開始包喇~~~ 夜媽媽一個人開工!!
糯米糰先推至中間
頭幾個要磅下重先, 之後果d駛架喇..... 大約就ok!
糯米糰壓平, 放入餡料
收口ing~~~
包得靚嗎?? 唔痴架, 好易包~~~
沾上椰絲即可
完成喇~~~~
皮比較薄, 所以見倒豆沙餡.....
我地一家三口的~~~ hee....hee.....
三十隻的份量..... 可以收工喇!
同事們的23隻
S的4隻cup cup糯米糍~~~ bear bear公仔, so cute!
