Staub - 川貝雪梨

阿女病咗........ 咳咳及傷風!

所以, 今晚煲咗川貝雪梨瘦肉湯比佢飲!

這個湯...... 係我咁大個女以黎, 第一次煲架咋.......
 
以前做女時, 連媽咪都未煲過比我飲......

其實, 我一早知川貝止咳好好!

於是上網搵咗d資料及食譜, 膽粗粗就煲咗這個湯!

唔買唔知....... 原來川貝好貴架!!!!

成$90一兩......... 即$1,440一斤!!!!




材料:
川貝5錢 (即半兩)
雪梨3個
蜜棗2粒
白果1兩 (約10粒)
南北杏適量
瘦肉$15
清水8碗
做法:

1. 雪梨洗好, 切開四件及去芯去頂, 留皮備用

2. 川貝, 蜜棗及南北杏清洗備用

3. 白果去殼, 去衣及去芯, 清洗備用

4. 瘦肉清洗, 切件, 汆水備用

5. 煲滾清水, 將以上材料一齊放入, 大火煲半個鐘, 轉細火煲多2個鐘即成

脆卜卜芝麻皮燒肉

材料:
五花腩斤半五香粉1湯匙
粗鹽適量
準備工夫:

1. 先將五花腩清洗好&抺乾, 用豬插插3分鐘, 再切開三條

2. 用五香粉搽勻五花腩(皮除外)
3. 豬皮舖上一層粗鹽, 約0.5cm厚

4. 唔好包保鮮紙, 將五花腩直接放入雪櫃, 醃過夜!


做法:

1. 預熱焗爐10分鐘, 220度火

2. 將豬肉連粗鹽一齊放入焗爐, 焗10分鐘

3. 取出豬肉, 除去粗鹽後, 再放回焗爐

4. 先以180度火焗90分鐘 (時間請自行控制, 不過一般都要焗60分鐘架)

5. 放涼後切件上碟

燒肉晚餐

今晚又整燒肉!

今次的工程非常浩大, 足足要焗個半鐘先食得!

因為豬肉太大件喇! 成斤半重.......

點解? 咪係個豬肉佬囉......

切咁鬼大舊比路明, 成2斤呀~~~

又話: 哥仔..... 大舊d, 咪可以食多d囉! wakakakaka......

好明顯係蝦路明啦! 男人行街市, 真係一定會比人恰!!!! 

不過算啦...... 學佢話齊, 食多d啦........

事先, 我已切開一件, 預留第日用黎炆梅菜用...... 亦可能整數字豬肉!

餘下的斤半豬肉, 就用黎整燒肉!

而且仲一豬兩食添, 先做脆卜卜燒肉, 明天就用黎炆豆卜! 好正呀.......

嘩...... $80的豬肉, 可以分開三餐食, 真係好抵喎!

豬肉佬, 你係得o既!!!!




今次整的燒肉, 同以前整果d好唔同!

因為...... 我用咗豬插呀!

先係豬皮上插3分鐘, 再搽五香粉係肉面, 最近係豬皮洒上粗鹽!

脆卜卜的芝麻皮就做倒架喇!

其實, 唔用豬插都可以做到脆卜卜的燒肉皮,

但係....... 唔係芝麻皮囉, 即豬皮會爆開, 而且冇咁鬆化! 

一句講晒...... 用咗豬插, 效果同燒臘舖買果d一樣架!!!!

Staub - 鹽焗雞

星期日, 我地一家三口去咗沙田行街街!

係超市, 路明見倒d雞好靚, 又新鮮........又大隻!

於是.........

路明: 老婆呀, d雞好靚咁喎....... 不如買隻三黃雞食下啦

我: 下.... 又食雞? 咁你想點整.......

路明: hee hee....... 當然係你至拿手的鹽焗雞啦!

我: 唔係掛...... 又係我! 前後要2日時間去做架喎....... 第二日放工, 又要拿拿聲拎去焗, 好多工架!!!

唉...... 路明鐘意食, 咁就整啦!

因為今次隻雞超大隻呀, 所以時間要長d, 比平時多15分鐘啦!

今次有d失敗, 唔記得係鍚紙上掃油, 攪到有少少痴住........ d雞皮有d甩!

好采唔請客啫, 唔係就真係失禮C人呀........




材料:
冰鮮雞一隻, 鹽焗雞粉一包, 粗鹽一包(約500g)

準備工夫:
1. 冰鮮雞去頭去頸, 清洗後抺乾, 內外搽上鹽焗雞粉, 放入雪櫃醃過夜備用(雞腳放入雞肚內)

做法

1. 從雪櫃取出已醃過夜的雞, 室溫回溫1個鐘
2. 鍚紙掃油, 包起冰鮮雞備用
3. 白鍋炒熱粗鹽
4. 放入冰鮮雞(雞胸向下), 將少許粗鹽灑在雞面上
5. 以中火煮75分鐘即可 (視乎雞的大細而定)

Staub - 孖腸排骨飯

心心煲買咗好耐, 今晚終於開光.......

滿心歡喜用佢黎煮煲仔飯啦.......... 點知....... 衰咗!

今次, 我都係用平時的方法黎者煲仔飯, 無論程序及時間都一樣........

就係咁先衰咗!!!

打開蓋, 諗住可以開飯啦..... 點知.......

d排骨未熟o既!!! 仲係紅紅地色.......

攪咩呀!!!

經過詳細思考......... 可能關個煲底事....... 佢個地比起round & oval/ 南瓜煲, 又真細好多喎!

可能接觸面細咗, 所以傳熱慢......... 煮食時間要更加多呢......

我的失敗之作, 要再返煲.......

因為趕住食飯, 我只好用中火, 再煲多10分鐘........

Wakakaka....... 一開煲蓋! 哈哈...... 今次真係食得喇! 全部熟晒lu......

因為再煮多咗10分鐘的關係, 好香飯焦味......

唔會太燶, 只係少少金黃色啫....... 老公至like啦!



今次, 我唔寫食譜喇, 等我研究好e個心心煲先......... wakakaka........

Staub - 炒菜芯

無聊......... 好無聊的我, 用咗Staub南瓜鍋黎炒菜心......

不過, 話時話喎, 又真係好快熟.......

鐵的傳熱真快....... 一陣就炒好喇!

wakakaka...... 煲仔飯都未食得, 個菜就炒好!

下次, 要夾夾時間先炒至得.......  

Staub - 簡單晚餐

連續放2日假, 要湊住阿女.....

加上佢又病咗..... 傷風&咳! 咳到唔停口......

唉.......真係累過返工!   

所以, 晚餐唔攪咁多野喇, 以簡單為大前題!!!!! - 清炒菜芯 + 排骨臘腸煲仔飯就算!

一個鐘就有飯食, 好快呢.......

LC - 芝士肉醬意粉

材料:
意粉大半包
免治豬肉約碗半
雜菜粒適量
芝士適量
蒜蓉1茶匙

豬肉醃料:
豉油半湯匙, 砂糖1.5茶匙, 麻油1茶匙, 生粉1茶匙, 清水半湯匙

汁料:
茄汁1碗, 砂糖半湯匙
做法:

1. 先醃好免治豬肉, 雜菜粒解凍清洗備用

2. 煲好滾水, 落1茶匙鹽, 放入意粉煮約8分鐘 (軟硬度, 請自行決定)

3. 意粉要過冷河, 瀝乾水份備用

4. 爆香蒜蓉, 加入免治豬肉略炒至8成熟, 落雜菜粒及意粉, 加入汁料炒勻

5. 將意粉倒入焗盤內, 晒上芝士, 放入預熱焗爐內, 用180度火, 焗至芝士溶化及金黃色即可 (約3分鐘)

LC - 雞肉粟米酥皮湯

Le Creuset 的Coastal Blue "痰罐仔"終於開光喇.......

今次用佢黎整雞肉粟米酥皮湯, 好正呀! yummy..........




材料:
金寶雞蓉粟米湯1罐 - 細size
現成酥皮1張
雞蛋1隻
清水3琬
做法:
 
1. 煲滾清水, 加入雞蓉粟米湯, 煮至滾起, 攪勻至滑身, 直至冇粒粒為止(唔可以冚蓋, 否則會滾瀉)

2. 熄火, 加入已打發過的蛋漿(留返少少掃酥皮面用)

3. 將雞蓉粟米湯倒入焗盅內, 蓋上酥皮, 掃蛋漿

4. 放入已預熱的焗爐內, 用180度火焗10分鐘即可

LC - 端午節晚餐

今日端午節, 一早出咗沙田行街街! 

我地兵分兩路, 阿女同Daddy去反斗城, 而我就去咗家品部巡視業務........

之後, 係超市會合, 買咗少少野就走人!
 
下午3:00返到屋企, 大豬&細豬, 都累到返著咗.......

好啦, 由得你地訓下...... 


 
我唔想出街食飯, 於是親自下廚, 攪攪新意思......

整咗老公&阿女至愛旳芝士肉醬焗意粉及雞肉粟米酥皮湯,

佢地訓咗3個鐘, 起身就有飯食!

佢地都話好好食! wakakaka..... 真開心呢~~~

一句好味, 就夠喇! 幾辛苦都直得,

亦係我的推動力, 我真係好鐘意煮飯呀! heehee 

Oil Mask

琴晚........ 終於的起心肝, 幫塊枮板做下Mask,

因為之前太忙, 雖然見倒佢乾淨淨, 都懶得過理佢,

定期幫佢做mask, 佢會靚好多架, 而且更加耐用!

原理............ 同女人做mask都一樣架啫...... wakakaka!



入返正題先......

同佢做oil mask其實好簡單,

只要o係乾枮板的每面搽上生油, 再用保鮮紙住, 焗佢2日啦....... 咁就得架喇

敷用mask, 用少少洗潔精洗一洗, 過下水就得! very easy.......

最好一個月做一次oil mask啦, 咁就very good喇!