釀鯪魚

自從結婚後, 都好少食這味餸, 冇同媽媽住, 好餸真係少咗唔少...... 唉........ 今晚整咗阿媽的撚手小菜 - 釀鯪魚...... 煎好後, 再打個豉油汁, 好味到極呀!!!

材料:
鯪魚1 條, 鯪魚滑$10、梅頭豬肉$10, 冬菇3粒, 蝦米少許, 花生1/3 飯碗, 馬蹄3粒, 蔥一棵, 薑2片

做法:
1. 冬菇及蝦米用水浸軟, 搓乾水, 切粒備用
2. 馬蹄去皮, 清洗後, 切粒備用
3. 蔥切粒, 薑切片備用
4. 花生以白鍋炒香(即只燒紅隻鍋, 唔落油), 直至變成金黃色, 離火待涼, 用手搣去花生衣, 再用豉油樽壓碎備用
5. 到街市買一條鯪魚, 叫魚佬幫手起皮, 起骨, 起肉, 記得講明要保留魚形
6. 將魚佬起出黎的2塊魚肉切碎, 加入魚滑肉, 再加麻油2茶匙, 胡椒粉少許作調味備用
7. 清洗魚皮, 抺乾備用
8. 梅頭豬肉攪碎, 加入少許雞粉, 砂糖, 麻油, 豆粉調味
9. 將所有材料攪勻 (薑片除外), 魚肚內洒上薄薄一層生粉, 釀入所有材料, 整成一條魚形
10. 做好的鯪魚, 要放入雪櫃一個鐘 (表面乾身d, 先容易煎)
10. 落油, 薑片起鍋, 將鯪魚放入, 先煎肚位, 再煎兩邊, 淋上調味料即成
11. 上碟後, 用刀仔切件(唔駛洗枮板嘛)

網上城市花園酒店的製作片段, 以供參考: http://www.youtube.com/watch?v=4F3HlqKw4AE

注意:
1. 材料可自行加減, 唔用豬肉都得, 但魚滑就要用多d
2. 魚肚內洒上一層生粉, 魚滑就會冇咁易甩出黎
3. 釀入的材料唔可以太多, 否則好難熟
4. 如果驚煎唔熟, 可以先蒸10分鐘, 放涼直至魚皮乾透再煎 (這個方法如果做得唔好, 魚尾及魚鰭會好易甩, 影響外表, 小心..... 小心......) \