Staub - 皮蛋瘦肉粥

 

過去一個星期, 病到死死下........

感染咗流感....... 流鼻水+ 咳........ 好鬼辛苦!!! 真係咳到肺都甩...........

日日咁食葯, 連胃口都冇晒........ 所以煲咗皮蛋瘦肉粥黎食!

我真係命苦喇, 作為病人, 都要自己煲粥, 點解路明同工人姐姐會唔識煲架????? !!!! 

竟然........... 要我這個病人親自出馬!!! 可惡呀..........

以前同媽咪住真好! 每次一病, 唔駛出聲, 必定有愛心靚粥食!!!!!  

今次, 我用咗Staub oval 27cm的綠色煲去煮!




材料:
免治豬肉$15, 皮蛋1隻, 米2/3杯, 水約15飯碗, 生油3茶匙

調味料:
豉油1.5湯匙, 砂糖2茶匙, 麻油少許, 生粉1茶匙, 清水半湯匙
做法:

1. 洗米後, 用生油撈勻備用 [註1]
2. 免治豬肉加入調味料備用
3. 皮蛋去殼, 切開6件備用
4. 煲滾熱水, 加入白米, 用中火煲再次滾起
5. 再轉細火煲1個鐘 (最後半個鐘, 加入皮蛋) [註2]
6. 免治豬肉用半碗凍滾水開浠, 加入白粥內攪勻, 煲多15分鐘 [註3]
7. 試味即可


溫馨提示:

註1 : 白米及油起碼要醃20分鐘架, 咁做的話, 煲出黎的粥一定棉

註2 : 煲粥時, 間中要攪下佢, 避免'痴'底

註3 : 加入免治豬肉前, 必須用半碗凍滾水開浠, 否則豬肉加入滾粥內會結成一'舊舊', 好難分開架