Staub - 無水豉汁蒸白鱔

今晚, 又用咗Staub黎整無水豉汁蒸白鱔!

15分鐘就食得, 係咪好方便呢?

因為條白鱔好大條, 又肥.......

所以, 我冇用油爆香蒜蓉及豆豉蓉....... 如果爆的話, 會香口好多喇!! 

唉..... 食少d油好d! 健康d嘛!!!!!!



材料:
白鱔 半條 (約一斤重)
子天椒  3條


醃料:
蒜蓉 2茶匙
豆豉蓉 4茶匙
麻油     半茶匙
豉油 1湯匙
清水 2湯匙
做法:

1. 準備蒜蓉及豆豉蓉, 子天椒切粒

2. 白鱔原條汆水3分鐘, 用粗鹽擦外皮去潺 (可用刀仔代替), 去除內臟及肥膏, 抺乾備用

3. 用手將醃料及白鱔攪勻, 醃半個鐘

4. 凍鍋落料, 將白鱔舖係鍋內, 再倒入醃料, 開火煮6分鐘(中火)

5. 再轉細火煮多9分鐘, 灑上子天椒粒

6. 試味即可

溫馨提示: 

1. 如果唔係用Staub去做無水蒸野, 2湯匙清水唔駛加, 而且豉油份量要減半, 即半湯匙就得喇!

2. 大家唔介意食肥少少, 可以先爆香蒜蓉及豆豉蓉先醃, 真係香口好多架!

3. 蒸煮的時間, 因白鱔的大細及厚度而定! 請自行執生!  (我上面提過, 今次買的白鱔好鬼大條, 而且切成厚件, 我就用咗15分去蒸, 熟透之餘, 爽口又多汁, 好好味呀)