夜媽媽洗蓮藕???
9:30諗住開始整南乳蓮藕炆豬手啦, 作為明天晚餐~~
點知....... 一時唔記得同姐姐講要洗蓮藕~~~
而佢又氹緊阿女訓教...... 於是親自去洗!
泥藕係好食好多架, 千其唔好為咗方便, 走去買白o雪o雪果隻蓮藕喎!
味道及口感真係差好遠架~~~ 而價錢都差一大節.....
泥藕: $12/斤; 而白淨蓮藕只需$7/斤啫.....
我買依2節細細地, 已經要$22~~~
題外話, Hubby擺到明玩野啦, 買果條大蓮藕, 竟然裡面係晒塘泥......
洗到我CC下..... 切成細件後, 要續件用筷子去通每個o隆~~~ 攪咗成半個鐘!
成個通渠佬咁, 之後講返比佢知, 只識係度笑我!!!
煮一餐係好辛苦架, 你明白嗎??? 居然笑我~~~
材料:
蓮藕2節
豬手1隻 (叫檔代斬及燒毛)
細南乳2件
砂糖半湯匙
清水2.5碗
薑片蒜頭適量
做法:
1. 蓮藕去泥, 洗淨, 去皮及切件備用
2. 豬手去毛(如有), 汆水1分鐘, 瀝乾水備用
3. 爆香薑片蒜頭, 加入南乳水( 南乳+3湯匙水) [加水可避免炒燶]4. 加入豬手及蓮藕略炒, 再加入砂糖及清水
5. 以中火煮至滾起, 煮20分鐘
6. 轉細火煮1個鐘, 熄火焗至涼透, 放入雪櫃, 食時翻熱即可
南乳(紅腐乳)係九龍城的醬油店買架
豬手好靚, 唔係好肥, 而且豬毛已經去除~~~ 唔駛點攪, 汆水即可
好靚的南乳, 味道香濃
加入所有材料~~~ 煲size啱啱好~~~
煲內好高溫, 雖然話熄火咋, d豬手都會係入面繼續煮..... 等到第二朝, 放入雪櫃即可!!! 食時翻熱就可以~~~
沒有留言:
張貼留言